Новагарадоцкі бой

Новагарадоцкі бой
Асноўны канфлікт: Вялікая Айчынная вайна
Новагарадоцкі бой
Дата	14 снежня 1943
Праціўнікі
425-ы партызанскі полк Нямецкія акупацыйныя войскі і іх саюзнікі

Новагарадоцкі бой — бой паміж 425-м партызанскім палком і нямецка-фашысцкімі захопнікамі ў вёсцы Новы Гарадок Быхаўскага раёна 14 снежня 1943 года.

Перадумовы

1-ы батальён 278-га грэнадзёрскага палка 95-й нямецкай дывізіі (каля 200 чалавек, узброеных бронемашынай, мінамётнай батарэяй, артылерыйскай гарматай), які панёс вялікія страты, быў размешчаны для перафарміравання ў вёсцы Новы Гарадок.

Бой

У ноч на 14 снежня 1943 года партызаны перайшлі ў наступленне, перакрыўшы ўсе падыходы да вёскі засадамі. 3-і батальён партызан атакаваў паўночную ўскраіну вёскі, дзе знаходзіўся штаб праціўніка, знішчыў яго, захапіў 2 палонных і штабныя дакументы, 2-гі батальён заблакіраваў дамы ў цэнтры вёскі, дзе размяшчаўся асабовы склад гітлераўцаў, падпаліў гаражы з аўтамашынамі, склады. 1-ы партызанскі батальён уварваўся ў вёску з поўдня. Праз 10 хвілін пасля штурму ўзвод партызан дэманстратыўнай атакай супраць найбольш шматлікага суседняга гарнізона ў вёсцы Лубянка адцягнуў увагу праціўніка. У выніку бою ўвесь нямецкі батальён быў знішчаны. Партызаны захапілі каля 80 адзінак стралковай зброі, боепрыпасы, усю амуніцыю і харчаванне батальёна. У гэтым баі партызаны страцілі 8 чалавек забітымі і параненымі.

Літаратура

• Пасэ, У. С. Новагарадоцкі бой // Беларусь у Вялікай Айчыннай вайне, 1941—1945: Энцыкл. / Рэдкал.: І. П. Шамякін (гал. рэд.) і інш. — Мн.: БелСЭ, 1990. — С. 384. — 680 с. — 20 000 экз. — ISBN 5-85700-012-2.