Савецкія войскі ў Манголіі
Савецкія войскі ў Манголіі |
---|
Савецкія войскі ў Манголіі — абагульняючая назва розных фарміраванняў РСЧА і УС СССР на тэрыторыі Мангольскай Народнай Рэспублікі.
Гісторыя[правіць | правіць зыходнік]
Упершыню савецкія войскі былі ўведзеныя ў Манголію ў 1921 годзе ў перыяд грамадзянскай вайны ў Расіі і Мангольскай народнай рэвалюцыі ў мэтах ліквідацыі Белага руху. У сакавіку 1925 года Савецкі Саюз вывеў ваенныя сілы з краіны.
У далейшым вайсковыя фарміраванні ўводзіліся ў 1932 годзе для падаўлення Хубсугульскага паўстання.
З 1937 года ў адпаведнасці з Пратаколам аб узаемнай дапамозе на тэрыторыі Манголіі былі разгорнутыя часці Чырвонай Арміі. Асноўнай крыніцай для іх часовага папаўнення з’яўляўся 11-ы механізаваны корпус, дыслакаваны ў Забайкаллі.
У маі—верасні 1939 года савецкія фарміраванні ўдзельнічалі ва ўзброеным памежным канфлікце каля ракі Халхін-Гол з Квантунскай арміяй.
У 1945 годзе ў краіну перадыслакавана 39-я армія. Яе часці разам з мангольскімі войскамі ў жніўні прынялі ўдзел у савецка-японскай вайне.
Да канца 1960-х гадоў ля паўднёвых межаў дзяржавы ўтворана магутная групоўка Народна-вызваленчай арміі Кітая. Мілітарызацыя ў рэгіёне была абумоўлена савецка-кітайскім расколам. У адказ да пачатку 1970-х гадоў у Манголіі ўтварылі перадавую групоўку са складу 39-й агульнавайсковай арміі. Узмацнілася і паветраная групоўка[1].
39-я агульнавайсковая армія, штаб якой знаходзіўся ў Улан-Батары, уключала ў сябе дзве танкавыя дывізіі, тры мотастралковыя дывізіі, разведвальную брыгаду, дзве зенітна-ракетныя брыгады, радыётэхнічную брыгаду, асобны полк сувязі, два інжынерных палка, дэсантна-штурмавой батальён, батальён РЭБ, асобны верталётны полк, асобны радыёбатальён. Групоўка войск у Манголіі лічылася самай магутнай у Забайкальскай ваеннай акрузе. Усяго на тэрыторыі краіны знаходзілася звыш 100 тыс. вайскоўцаў.
4 лютага 1989 года было падпісана савецка-кітайскае пагадненне аб скарачэнні колькасці войскаў на мяжы. 15 мая савецкае кіраўніцтва заявіла аб частковым, а затым аб поўным вывадзе 39-й арміі Забайкальскай ваеннай акругі з Манголіі.
Працэс заняў 28 месяцаў. 25 верасня 1992 года было афіцыйна абвешчана аб завяршэнні вываду сіл (да таго моманту, ужо не савецкіх, а расійскіх). Апошнія замежныя вайскоўцы пакінулі краіну ў снежні 1992 года[2].
Крыніцы[правіць | правіць зыходнік]
- ↑ Последние бронепоезда Советской Армии(недаступная спасылка). Архівавана з першакрыніцы 2 лістапада 2011. Праверана 30 ліпеня 2010.
- ↑ «КоммерсантЪ» № 97(3181) от 31 мая 2005 . Архівавана з першакрыніцы 17 ліпеня 2015. Праверана 14 ліпеня 2015.